大话西游，拾年之后
拾年前，我第一次睇<大话西游>，应该係无线电视翡翠台星期六夜晚播出个种广东话电影。至尊宝同学应该係94年就有了，不过我最终见到佢，应该都係迟佐几年。94年，我先翻小学二、三年班，乜嘢都唔识啊。就见到一只马骝跳来跳去，时不时变成一个靓仔去沟女。朱茵从来唔係我条菜，周星驰对我来讲亦都太老，我都唔知我睇呢部戏係为佐乜。
宜家我知道了，不过已经迟佐拾几年。
“豆瓣”上面有条友发贴话，佢用佐10年时间先睇得明呢出戏，睇明佐之后”恍然大悟，悲情万分”。边有咁夸张？我咁双鱼既人都净係流佐两滴眼泪遮。不过，我估条友係男人，又或者係gay。呢出戏完全就係拍俾男人睇既。係男人先会问，至尊宝究竟钟意(用爱上更恰当D)边个：白晶晶、紫霞，定係佢自己都唔知道？
我估，大部分男人肯定选自己都唔知道。佢地真系唔係扮野，係真係唔知。
好似大多数人睇完<大话西游>，都净係挂住分析至尊宝。有个经典而且深刻既评论我几钟意，如果冇呢个评论，或者我点都唔会再睇呢只马骝：
“当至尊宝仲係至尊宝既时候，佢尽情咁去爱，为佐白晶晶居然摞住月光宝盒翻到五百年前，甚至唔小心撞埋紫霞。至尊宝救老婆救唔成，反而唔小心爱上佐紫霞，虽然自己未必知，不过佢又有咩能力爱上佢呢？但係当至尊宝变成孙悟空，佢亦知道自己深爱紫霞既时候，佢又因为要背负太多责任而唔可以再去爱了。”
所谓由男仔变成男人，就係咁既道理。变成孙悟空既至尊宝，永远都唔可以再去爱紫霞了。虽然我相信佢的确係身不由己。
拍戏就话可以happy ending，真是生活中边有可能？大部分男人都选择hit-and-run(嚼完松)，或者唔係佢地有心，可能真係为女人好。不过大部分男人係冇咁伟大既，如果俾你碰到，就算执到了。
讲翻女人，如果你係紫霞，你宁愿爱至尊宝定係孙悟空，抑或都唔爱？其实唔爱係最安全既。但係紫霞根本冇得拣，”上天注定既，大晒”。冇错，天注定既嘢就係冇得拣。上天就係好钟意玩嘢，俾你一样好嘢，但是你千其唔好去问俾我几耐，记得尽兴，唔好问”永远”。如果紫霞早就知道，至尊宝有一日係要翻去陪唐僧取西经，佢仲会唔会发”佢一定会骑七彩祥云来救我”既梦呢？
我发过。
可惜我唔係紫霞。孙悟空最后都係将至尊宝带翻去紫霞身边，但係我冇孙悟空。
原来，The Chinese Odyssey is an Odyssey of love。
大话西游，拾年之后。
